اسلام آباد کے علاقے ترلائی میں 6 فروری 2026 کو امام بارگاہ خدیجۃ الکبریٰ میں جمعہ کی نماز کے دوران ہونے والے خودکش حملے نے پورے ملک کو غم و اندوہ میں مبتلا کر دیا۔ اس افسوسناک واقعے میں کم از کم 31 افراد شہید اور 169 سے زائد زخمی ہوئے۔ حملہ آور نے نماز کے وقت دھماکہ خیز مواد استعمال کیا، جب نمازیوں کی بڑی تعداد موجود تھی۔ اس حملے کی ذمہ داری داعش نے قبول کی ہے، جبکہ حکومتی ادارے دیگر شدت پسند گروہوں کے ممکنہ تعلقات کی بھی تحقیقات کر رہے ہیں۔

دہشت گردی کا اصل مقصد معاشرے میں خوف، انتشار اور فرقہ واریت کو ہوا دینا ہے۔ یہ حملے کسی ایک فرقے یا طبقے پر نہیں بلکہ پورے پاکستان پر حملہ ہیں۔ دشمن چاہتا ہے کہ ہم آپس میں تقسیم ہو جائیں، لیکن ہماری اصل طاقت اتحاد اور یکجہتی میں ہے۔

چاہے ہم شیعہ ہوں یا سنی، ہدف سب پاکستانی ہیں۔ مشکل وقت میں ایک دوسرے کا سہارا بننا، افواہوں اور نفرت انگیز بیانیے سے گریز کرنا، اور قانون نافذ کرنے والے اداروں کا ساتھ دینا ہماری اجتماعی ذمہ داری ہے۔ مشکوک سرگرمیوں کی اطلاع دینا اور امن قائم رکھنا ہی دہشت گردوں کے عزائم کو ناکام بنا سکتا ہے۔

یہ حملہ ہمیں یاد دلاتا ہے کہ دہشت گردی کا مقابلہ صرف ریاستی اداروں کی ذمہ داری نہیں بلکہ ہر شہری کی بھی ہے۔ ہمیں اپنے اختلافات کو پس پشت ڈال کر ایک قوم بن کر کھڑا ہونا ہوگا۔ اسلام آباد اور پاکستان کے دیگر شہروں میں امن اسی وقت قائم ہوگا جب ہم سب مل کر دہشت گردوں کے ناپاک عزائم کو ناکام بنائیں گے